Оқушылармен кездесу

Есіл аудандық мешітінің бас имамы Бақжарық Қызыр және Есіл ауданының жастар ресурстық орталығының директоры Баягизов Асхат қазан айының 19 жұлдызында мектебімізге келіп, 10-11 сыныптардың оқушыларымен кездесті. Бұл басқосудың басты мақсаты – оқушыларды теріс пиғылды ағымдардың ықпалынан қорғау, ғаламтордағы қауіпті сайттардан сақтандыру мәселесі болды.  

Басқосуда бас имам оқушыларға бейбітшіліктің діні және қантөгіс атаулының дінімізге жат екенін айтып өтті. Сондай-ақ асыл дініміз әр адамның ар-намысы мен өміріне зиян тигізбеуге, әр адамның діни сенімі мен түр-сипатына қарамай мейірімді, сыпайы болуға шақыратынына да ерекше тоқталды. Қазіргі таңдағы, әсіресе, жастарымыздың арасында діни сауаттылықты арттыру – діни алауыздықтан сақтандыратынын, жастардың діни уағызды кез-келген жерде кездейсоқ адамдардан естіп, соның нәтижесінде адасушылыққа тап болатынын баса айтты. Жастардың жат ағымның жетегінде кетпей, ислами дұрыс бағытта жүруінің бірден-бір ықпалы сенімді ақпарат екенін де тоқталып, әрқашан да діни сауаттылықты тек оқыған дін мамандарынан алу керек деген тұжырымдама жасады. Ал,жастар ресурстық орталығының директоры А.Баягизов, оқушыларды адастыратын интернеттегі жалған ақпарат көздері екенін айтып, діни сайттарға тіркелмеу керектігін ескертті.

Жиын соңында қонақтар оқушылардың сауалдарына нақты және толық жауап беріп отырды. Сондай-ақ, жалпы Ислам дініне қатысты сұрақтар бойынша тек қана Қазақстан Мұсылмандары Діни басқармасының бекіткен мешіт имамдарына қойюлары керектігін ескертіп, қажетті мағлұматты тек аталған басқарманың ресми сайттарынан ғана алуды қадап айтты.